500 Internal Server Error — што значи и како се решава

Сајтот работеше. Сега пишува „500 Internal Server Error“ и ништо друго.

Пораката е намерно нејасна — серверот не открива детали од безбедносни причини. Но причината е речиси секогаш една од четири.

Прво: вклучете ги грешките

Без ова барате слепо. Во wp-config.php, пред линијата „That's all“:

define('WP_DEBUG', true);
define('WP_DEBUG_LOG', true);
define('WP_DEBUG_DISPLAY', false);

Освежете ја страницата, па погледнете во wp-content/debug.log. Таму пишува точно кој фајл и кој ред.

Не заборавајте да го исклучите кога ќе завршите.

1. Плагин или тема (најчесто)

Обично по ажурирање или инсталација.

Ако не можете да влезете во админ: преку FTP или File Manager преименувајте ја папката wp-content/plugins во plugins-off. Сите се исклучуваат.

Ако сајтот проработи — виновникот е плагин. Вратете го името, па исклучувајте по еден додека не го најдете.

Истото за темата: преименувајте ја нејзината папка и WordPress ќе се врати на стандардна.

2. Расипан .htaccess

Преименувајте го во .htaccess-old и освежете.

Ако проработи — таму бил проблемот. Влезете во Settings → Permalinks и само притиснете Save; WordPress ќе направи нов, чист.

3. Недостасува меморија

Во wp-config.php:

define('WP_MEMORY_LIMIT', '256M');

Ако тоа помогне, значи некој плагин троши повеќе отколку што треба. Решението е привремено — најдете кој.

4. Погрешни дозволи на фајлови

Папки треба да се 755, фајлови 644. Ако некој ставил 777 „за да работи“, некои сервери го одбиваат тоа од безбедност.

Во File Manager: селектирајте сè, Permissions, применете рекурзивно.

Ако ништо не помага

Побарајте од хостингот да го погледне серверскиот error log. Таму пишува повеќе отколку што гледате вие, а поддршката го гледа за минута.

Кај нас тоа е дел од поддршката — не наплаќаме за читање на лог.

Како да не се повтори

Ажурирања на staging копија прво, бекап пред секоја поголема измена, и не инсталирајте плагин што не е ажуриран повеќе од година.